Leat hirbmat ilus go dál leat dása olahan – dál lei áigi. Romssa álbmot oamasta Troms Krafta, álbmot geaid gaskkas hállet sihke dárogiela ja sámegiela. Vaikke eatnašat máhttet dárogiela, de lea min ulbmilin láhčit dili nu bures go vejolaš gulahallat sámegilliige, dadjá Stein-Gunnar Bondevik, Troms Kraft servodatgulahallanolmmoš.
Ovttasbargu Sámedikkiin bođii áigái maŋŋilgo Troms Kraft Nett ja Nordlandsnett el-fierpmádatfitnodagat ovttastuhttojuvvo, ja válljiimet dan ođđa fitnodahkii sámegiel nama Arva. Dat álggahii ovttasbarggu mii ii guoskka dušše gillii, muhto rávvesta velá mo elfápmofitnodat galgá dás ovddas ovttasdoaibmat sámi servodagain.
-Lei dehálaš ahte dát geavai ávddalaččat. Ii sáhte bidjalit el-fierpmádatfitnodahkii sámi nama sahtedohko. Danne leat hirbmat movttet go Sámediggi mieđai dán ovttasbargui minguin, dadjá Bondevik.
Sámegiel siiddut eai leat dárogiel siidduid čabu speajalgovvan, muhto bájuhit sámegillii eanaš oasi daid mávssolaš dieđuin. Dasa lassin lea Troms Kraft-konseardna láhčimin dili nu ahte kundariid sáhttá vástidit sámegillii. Šiehtadusain Sámedikkiin lea ulbmilin maiddái ráhkadit luoddakártta buori, jotkkolaš gulahallamii gaskal energiijafitnodaga ja sámi servodaga.
-Sámedikkis lea celkojuvvon ulbmil oažžut sámegiela oinnolaččabun Norggas. Danne lei midjiide lunddolaš searvat ovttasbargui, go riikaoasi okta stuorámus fitnodagain dáhtui geavahit sámegiel fitnodatnama. Jáhkkit ja sávvat ahte dát prošeakta bijašii málle eará fitnodagaide mo geavahit sámegiela sin profileremis, ja eanebut galggašedje dieđus dahkat nugo Troms Kraft. Dán galgá datte vuđolaččat dahkat ja sámi kultuvrra gudnejahttimiin, dadjá Sámedikki giellasuorggi sámediggeráđđi, Mikkel Eskil Mikkelsen.
Dál lea dušše eadnefitnodat Troms Kraft daid ođđa siidduid almmuhan. Arva ja Ishavskraft almmuhit viggamušaideaset maŋŋil.
Gova gurut ravddas: Frøydis Dalseng, Troms Kraft, Risten Aile Mienna, Arva, Anne Helene Bals, Ishavskraft, Hege Villumstad, Arva, Hege Schanche, Sámediggi
Duogábealde ges oainnát: Magne Svineng, Sámediggi, Mikkel Rasmus Logje, Sámediggi, Stein-Gunnar Bondevik, Troms Kraft, Sten Willy Andreassen, Ishavskraft